Lanbideren Euskal Enplegu Behatokiaren datuen arabera, 2024an sei egresatutik batek bakarrik uzten du EAEko lan-merkatua. %63ren helburua soldata, egonkortasun eta proiekzio profesional hobeak lortzea da, eta gainerakoek arrazoi pertsonalengatik egiten dute. Kanpoan lan egiten dutenen %95 inguru itzuliko lirateke lan-baldintza hobeak edo aldaketa pertsonalak egongo balira.
Deustuko Unibertsitateak antolatutako Enplegu eta Ekintzailetza Foroan, Mikel Torres lehendakariorde eta Ekonomia, Lan eta Enplegu sailburuak adierazi du enpresen, unibertsitatearen eta erakundeen arteko lankidetza indartzea funtsezkoa dela gazteen talentua erakartzeko, atxikitzeko eta kalitatezko enpleguarekin laguntzeko.
2018az geroztik, sustapen guztietan, Euskaditik kanpo lan egiten duten unibertsitateko egresatuen proportzio handiago batek lanaldi osoa, enplegu egokitua, egonkortasuna eta ikasketen eta enpleguaren arteko erlazio hobea ditu.
Talentuaren errotzea
Foroaren 21. edizioa talentuaren errotzearen ingurukoa izan da. 2025ean argitaratutako txosten batean oinarritutako “Diaspora, talentua eta enpleguaren etorkizuna Euskadin” hitzaldian, Guillermo Dorronsoro Deusto Business Schooleko irakasleak adierazi du Euskadin jaiotako 40 urtetik beherako 30.000 pertsona atzerrian bizi direla eta 142.000 beste autonomia-erkidego batzuetan. Datuak, Estatistikako Institutu Nazionalaren Errolda Jarraitutik datoz. Horrez gain, Europako herrialdeen artean talentua erakartzeko eta atxikitzeko lehia areagotu dela azpimarratu du.
Torresek esan du: “Ez da kontua kanpora joatea eragoztea, baizik eta hemen baldintza profesional erakargarri, lehiakor eta berritzaileak sortzea”.
Susana Gonzalez Bizkaiko Foru Aldundiko Enplegu zuzendari nagusiak Gazte Enplegua, Gazte On eta 3R Gaztea ekimenak aipatu ditu bere hitzaldian. Bestalde, Kontxi Claver Bilboko Udaleko Ekonomi Garapen, Merkataritza, Turismo eta Enplegu zinegotziak 24 erakundek osatzen duten enplegu eta toki-garapenerako mahaiaren lana nabarmendu du. Azkenik, BBK Fundazioaren Gizarte Ekintzatik, Nora Sarasola zuzendariak azpimarratu du zein beharrezkoa den migratzaileen talentua.
Deustuko Unibertsitatearen eta Lanbideren arteko lankidetza
2009tik Deustuko Unibertsitatea Lanbideren zentro laguntzailea da. Orduz geroztik, banakako 6.650 orientazio eman ditu, eta ekintzailetzarako 127 beka, trantsiziorako 2.226 eta Global Training 536 beka eman ditu.