• Enpleguak portaera hobea du lehentasunezko kolektiboetan, eta horien artean 30 urtetik beherakoak nabarmentzen dira; talde horretan 1.089 gaztek utzi diote langabeziari (- % 5,80)

• Urteko laugarren hilabetea 106.811 langaberekin amaitu da, 48.770 kontratazio sinatu ondoren, % 24 mugagabeak, eta kopuru hori egonkor mantentzen da lan erreformaz geroztik

Euskadiko enpleguak bere alde ona erakutsi du berriro ere apirilean, Gizarte Segurantzako afiliazioaren errekor berri batekin eta sektore gehienetan, adin tarte guztietan, lurralde guztietan eta gizonen zein emakumeen artean erregistratutako langabeziak behera egin baitu.

Gainera, apirileko datuek joera positiboa berretsi dute, urte arteko tasa negatiboak ondoz ondoko zazpi hilabetetan batu ostean.

Apirilean martxoan baino 1.503 langabe gutxiago (- % 1,39) eta 2024ko apirilean baino 2.742 gutxiago (- % 2,50) izan ziren, hein batean zerbitzuen sektoreak Aste Santuan izandako gorakadaren ondorioz. Horrela, enpleguaren bilakaera positiboa berretsi da, hilabete hau zazpigarrena izan baita jarraian urte arteko saldo negatiboarekin, eta 106.811 langabe zenbatu dira.

Adin tarteen arabera, 30 urtetik beherako taldea izan da langabeziatik gehien atera den taldea (-1.089), eta joan den hilabetean, berriz, 45 urtetik gorakoa (-295). Horrek erakusten du Ekonomia, Lan eta Enplegu Sailak abian jarritako politikak fruituak ematen ari direla, lehentasunezko kolektiboetako pertsonen, gazteen eta 50 urtetik gorakoen prestakuntza eta enplegagarritasuna sustatzeko ekintzen bidez.

Sexuaren arabera, emakumeen langabeziak portaera hobea izan du, 922 emakume langabe gutxiagorekin, eta langabeziaren zerrendetatik atera dira 581 gizon. Urte arteko balantzean, 1.576 emakumek aurkitu dute lana, eta 1.166 gizonek.

Sektoreka, hileko terminoetan, langabeziak behera egin du sektore guztietan, industrian izan ezik (+95 pertsona), agian manufaktura sektorean nazioarteko ezegonkortasun ekonomikoak eta Estatu Batuetako presidenteak iragarritako muga zergek eragindako ziurgabetasunen ondorioz. Bilakaerarik onena zerbitzuen sektorean izan da, 1.213 langabe gutxiagorekin (- % 1,60), eta aurretik enplegurik ez zutenen taldean, - % 282
(- % 1,94).

Urte arteko datuei erreparatuz gero, sektore guztietan joera positiboa da nagusi: eraikuntza (- % 8,53 eta 583 langabe gutxiagorekin) eta zerbitzuen sektorea (- % 2,88 eta -2.215 langabe gutxiagorekin); ondoren nekazaritza eta arrantza (- % 5,54 eta -112). Aurreko enplegurik gabekoen taldearen hil arteko datua ona izan arren (-282), urte arteko balantzeak erakusten du talde horretako 116 pertsona gehiago daudela langabezian 2024ko apirilean baino.

Kontratuak eta Gizarte Segurantza

Kontratazioari dagokionez, apirilean 48.770 kontratu erregistratu dira; horietatik 11.700 (% 24) mugagabeak izan dira, eta ehuneko hori egonkor mantendu da lan erreformaz geroztik.

Sektoreka, ohikoa den bezala, etxeetako jarduerak nabarmentzen dira, kontratu mugagabeen % 85,4rekin, eta eraikuntza, % 66,6ko kontratazio mugagabearen tasarekin, sektore horietan joera positiboa berretsiz. Erauzketa industriak hirugarren mailara igo dira, % 60rekin, eta higiezinen jarduera laugarren postura lekualdatu du (% 57,9).

Gizarte Segurantzako afiliazioaren errekor historiko berria izan du Euskadik apirilean 2.402 kotizatzaile irabazi baititu, aurreko hilean baino % 0,23 gehiago. Beraz, guztira, 1.024.840 afiliatu ditu, abenduan baino 329 gehiago. Urte arteko datuak kontuan hartuta, Euskal Autonomia Erkidegoan 11.124 langile afiliatu dira, 2024ko apirilaren aldean, hau da, % 1,10 gehiago.

Ondorioz, ziurgabetasun globalak gorabehera, joera positiboa berretsi da sektore guztietan; batez ere, urte arteko terminoetan. Dinamika hori lan merkatua ari da irekitzen, bereziki, lanpostu bat lortzeko zailtasun handienak zituzten pertsonei; hala nola, gazteei, emakumeei eta 45 urtetik gorakoei, eta horrek bultzatzen gaitu lehentasunezko kolektibo horientzako enplegu politika aktiboak bultzatzen jarraitzera Enplegu Zerbitzu Publikotik, Lanbidetik eta Ekonomia, Lan eta Enplegu Sailetik.