Lanbideren Administrazio Kontseiluak funtsezko ildoak sustatzen ditu prestakuntza digitalean eta lehentasunezko kolektiboen enplegurako laguntzan, Euskadin laneratzea eta lan-modernizazioa indartuz
Azaroaren 26an, Lanbide-Euskal Enplegu Zerbitzu Publikoko Administrazio Kontseiluak bilkura bat egin zuen, eta bertan, besteak beste, garrantzi bereziko hiru gai onartu ziren laneratzeko eta sektore giltzarrien modernizaziorako: desgaitasuna duten pertsonen lanpostuak mantentzeko laguntzen deialdia, turismo sektorean prestakuntza digitalerako dirulaguntzen araudia eta deialdia, eta lehentasunezko kolektiboentzako enplegu proiektu integraletarako baliabide ekonomikoen gehikuntza.
Enplegu inklusiboaren bultzada
Bilkura honetan Lanbidek onartutako inbertsiorik nagusi eta nabarmenena Euskadiko Desgaitasuna duten Pertsonentzako Enplegu Zentro Berezietan (EZB) lanpostuak mantentzeko laguntzen deialdiari dagokio. Guztira 80.000.000 euroko aurrekontua du dirulaguntza horrek, eta kolektibo zaurgarri horren lan-egonkortasuna bermatzea eta zentro horien bideragarritasun ekonomikoa ziurtatzea da helburu estrategikoa.
Laguntza hauen helburu nagusia desgaitasuna duten langileen soldata-kostuak ordaintzea da, haien enpleguaren jarraipena eta Enplegu Zentro Berezietan iraunkortasun ekonomikoa errazteko.
Dirulaguntzaren %95a hilean behin ordaintzen da, erakunde onuradunek baliabideen plangintza egonkorra izan dezaten. Gainera, laguntza hauek arautzen dituen esparru juridikoaren xedea laneratzeko inklusioa eta desgaitasuna duten pertsonen eskubideen betetze osoa erraztea da.
Diru-banaketa bi ekitalditan egiten da: 76.000.000 euro 2026ko ordainketa-kredituari dagozkio, eta 4.000.000 euro 2027ko konpromiso-kredituari, laguntzaren jarraipena eta lanpostuen sendotzea bermatuz epe ertainera.
Turismo sektorearen eraldaketa digitala: lehiakortasunerako prestakuntza
Bilkura berean, Lanbideko Administrazio Kontseiluak onartu zituen prestakuntza digitalerako planak finantzatzeko laguntzen oinarriak eta deialdia (Euskal Autonomia Erkidegoko turismo sektoreari zuzenduak), eta guztira 1.982.342,08 euroko inbertsioa izango da. Ekimen hau Berreskuratze, Eraldaketa eta Erresilientzia Planaren barruan kokatzen da, Europar Batasuneko Next Generation EU funtsak finantzatuta, eta helburua da turismo sektoreko langileen gaitasun digitalak indartzea, sektore hori euskal ekonomiaren estrategikotzat jotzen baita.
Digitalizazioaren aldeko apustua gaitasun digitaletan sustatzean datza, teleprestakuntza modalitatean, eta bereziki zuzenduta dago enpresa txiki eta ertainentzat (ETE), langabe edota lanean dauden pertsonentzat, baita sektorean 29 urtera arteko gazteentzat ere. Programaren helburua da lan-indarra egokitzea teknologia berrietara, enpresa turistikoen iraunkortasuna eta produktibitatea hobetzea, eta merkatuaren erronken aurrean turismo-enpresen erresilientzia indartzea.
Deialdiaren finantzaketa bi urtetan banatzen da: 991.171,04 euro 2025eko ekitaldirako eta beste horrenbeste 2026rako. Funtsak Europako Batasunaren Berreskuratze eta Erresilientzia Mekanismotik datoz, eta horrek programaren sendotasun eta irismena bermatzen du.
Prestakuntza eta kontratazioko ekintza integraletarako baliabide ekonomikoak handitzea
Lanbidek hartutako erabakien artean honako hau ere izan da: lehentasunezko kolektiboei zuzendutako enplegu-proiektu integraletarako laguntzen deialdirako baliabide ekonomikoak handitzea. Hasieran, deialdiak 7.505.000 euroko aurrekontua zuen, baina jasotako eskaera kopuru handia ikusita, zenbatekoa 1.495.000 eurotan handitu da, guztira 9.000.000 eurora iristeko. Funtsen banaketa horrela izango da: 6.030.000 euro 2025eko ordainketa-kredituari dagozkio, eta 2.970.000 euro 2026ko konpromiso-kredituari. Aurrekontuaren gehikuntzak bi helburu ditu: deialdiaren harrera onari erantzutea, eta ahalik eta onuradun gehienei laguntzea, zertarako eta kolektibo zaurgarrienen laneratzea indartzeko eta arreta gehien behar dutenei lehentasuna emateko.
Beraz, 90 milioi euro baino gehiagoko inbertsio globalarekin, Lanbidek zuzenean laguntzen du enplegagarritasuna, gizarte-kohesioa eta euskal ekonomiaren lehiakortasuna hobetzen. Neurri horiek enplegua babestu eta sortzeaz gain, berrikuntza eta aukera-berdintasuna bultzatuko dute, Euskadi erreferente bihurtzeko enplegu-, inklusio- eta prestakuntza-politiketan.