1,2 milioi euroko finantzaketa Europan, Aukeraberri programa indartzeko

Argitalpen-data: 

Lanbide.

Lan eta Enplegu Sailak eta Ekonomia eta Ogasun Sailak erabaki dute Lanbide Euskal Enplegu Zerbitzu Publikoak 1,2 milioi jasotzea Globalizaziora Egokitzeko Europako Funtsetik (GEEF), krisian dauden sektoreetako langileak birkualifikatzeko eta birkokatzeko Aukeraberri programa indartzeko. Euskadi izan zen Gizarte Elkarrizketarako Mahaian adostutako proiektuari Europako Batzordearen eta Europako Parlamentuaren berariazko babesa jaso zion lehen eskualdea.

Lehendakariorde eta Lan eta Enpleguko sailburu Idoia Mendiak eta Ekonomia eta Ogasuneko sailburu Pedro Azpiazuk bihar, asteartea, Jaurlaritzaren Kontseiluari aurkeztuko diote Lanbideren aurrekontu-gehikuntza gauzatzen duen dekretua, programa hori finantzatzeko. 2021ean, EAEren finantzaketa propioarekin, 108 langile birkokatzea lortu zuen lehen esperientzia pilotuan, eta horrek esan nahi du benetako bitartekotza-indizea % 44 dela, zerbitzu publikoetan ohikoa dena baino askoz handiagoa.

Proiektua lehendakariordeak proposatu zuen legegintzaldi honetako lehenengo aurrekontuetan, enpresak eraldaketa ekonomiko eta sozial handietara egokitzeagatik kaleratutako pertsonen talentua eta esperientzia ez galtzeko. Kontua zera da, kontratatzen jarraitzen den sektoreetan lehenbailehen enplegu bat aurkitzeko aukera emango duten eta enplegagarritasun-baldintzak okertzea saihestuko duen eta, aldi berean, enpresen premiei erantzungo dien arreta goiztiarreko programa integral bat sortzea.

Proposamena Elkarrizketa Sozialaren Mahaira eraman zen, eta bertan erabaki zen iazko urtarrilaren 27an. Programa berria denez, Lanbidek talde espezifiko bat jarri zuen abian, borondatez parte hartu nahi izan zuten eta orientazio- eta prospekzio-lana egiteko prestakuntza espezifikoa jaso zuten 12 pertsonaz osatua. Talde horrek enpresak eta langileak identifikatu zituen, eta parte hartzeko gonbidapenak egiten hasi zen.

Uztailean, Administrazio Kontseiluak onartu egin zuen metalurgiaren, produktu metalikoen eta bestelako garraio-materialen sektorera mugatutako programaren behin betiko ebazpena. Urrian manufaktura-industria, handizkako eta txikizkako merkataritza, ostalaritza, finantza- eta aseguru-jarduerak eta bidaia-agentziak zabaldu ziren. Hilabete horretan bertan, Europako Batzordeak erabaki zuen Globalizaziora Egokitzeko Europako Funtsen 1,2 milioi eurorekin babestea ekimena. Gerora, Europako Parlamentuak bermatu zuen funts horiek orain jasotzen diren funtsak direla, eta produktu metalikoen fabrikazioaren sektore ekonomikoan gertatu diren langileen kaleratzeen ondorioz lan-merkatuko neurri aktiboetara bideratuko direla.