Euskadik eta Akitaniak diru-sarrerak bermatzeko eta gizarteratzeko errentari buruzko esperientziak partekatzen dituzte

Argitalpen-data: 

Lanbide.

Akitaniako ordezkariekin topaketa
  • Topaketak, Baionan, Frantziako eredutik ikastea du helburu, Lanbidek bere politiketan eraginkortasun handiagoa lor dezan
  • Alfonso Gurpegui Enpleguko sailburuordeak, Gloria Múgica Lanbideko zuzendari nagusiak eta Sara Buesa Prestazioetako zuzendariak hartu dute parte

Enplegu eta Gizarteratze Sailburuordetzaren eta Lanbide Euskal Enplegu Zerbitzuaren ordezkaritza bat Akitaniako ordezkariekin bildu da gaur, diru-sarrerak bermatzeko dituzten errentei buruzko esperientziak partekatzeko eta enplegu-sistemekin eta gizarte-zerbitzuekin koordinatzeko. Topaketa Baionan egin da, eta Frantziako eredutik ikastea du helburu, Lanbidek bere politiketan eraginkortasun handiagoa lor dezan.

Enplegu Sailburuordetzak aldaketa sakona egin du duela hilabete batzuetatik hona Lanbiden, Gizarteratzeko eta Diru Sarreren Sistemaren Legean eta Enpleguaren Legean. Alde batetik, Lanbide Hobetzen proiektua garatzen ari da, zerbitzu publikoaren eraldaketa sakona dakarrena. Gainera, Diru-sarrerak Bermatzeko eta Gizarteratzeko Euskal Sistemaren lege-aurreproiektuak Jaurlaritzaren barne-izapidetzeari jarraitzen dio, urtea amaitu baino lehen Eusko Legebiltzarrera bidali ahal izateko. Era berean, Euskal Enplegu Sistemaren Legeak ere bere prozesua jarraitzen du, arlo horretan aurreikusitako jarduera guztiak arautuko baititu.

Testuinguru horretan, eta Euskadi-Akitania euroeskualdeko lankidetzaren esparruan, Lan eta Enplegu Saileko ordezkaritza bat Baionara joan da gaur, bertan abian jarritako esperientzietatik eta ereduetatik ikasteko asmoz.

Zehazki, goizean, Alfonso Gurpegui Enplegu eta Gizarteratze sailburuordea, Gloria Múgica Lanbideko zuzendari nagusia eta Sara Buesa Prestazio eta Gizarteratze zuzendaria buru dituen taldea Pirinio Atlantikoetako gizarte-politiken talde arduradunarekin bildu da, RSA sistema, Frantziako Diru-sarrerak Bermatzeko Errenta eta garatzen duten bereizketa-prozesu guztia ezagutzeko, eta, halaber, Lanbidek enpleguari dagokionez, errentarik handiena lortzeko aukera izan dezan.

Bestalde, arratsaldean, taldea Pirinio Atlantikoetako Enplegu Zerbitzuekin bildu da, esku hartzeko eta enplegu-eskatzaileari arreta emateko duten ereduari buruzko iritziak trukatzeko, bai eta gai horretan mugaz gaindiko lankidetzari buruzkoak ere.